طول عمري باحس إن الكتابه علاج.. وحيث إن الهواء الروحي والنفسي اللي بنتنفسه والأجواء الروحيه مليانه ميكروبات وفطريات وعوالق وغبار فالكتابه وسيله تنفيس وتنفُس مهمه جدا .. العلاج مش للي بيقرا حاشا لك يا أفندم.. العلاج للي بيكتب
وموضوع المدونات ده فرصه من السما عشان الواحد يتعالج ويكتب ويتنفس .. طبعا مش يتنفسن
وحتى لو يتنفسن .. أهو يتنفسن على الكي بورد والنت أحسن مايتنفسن على خلق الله اللي حواليه
قولو آمين
وحيث إني وحدي مع كبيوتري العزيز قررت أن أكتب بحريه تامه خارج حدود المألوف
وخلي البساط أحمدي وخلي اللي يقول يقول وطظ في القطط وكأني جاعد بالجلابيه في الغيط تحت السجره مع العيال زفلط وشماشرجي وأبو سوسو
الجماعه بتوع النيو إيج The New Age ودا دين موجود في كل العالم وبينتمي ليه ناس كتير من المشاهير دلوقتي بيقولوا إن الله عباره عن القوه المسيطره على الكون وهو الطاقه اللي لما نتصالح معاها بنتصالح مع الكون ونتصالح مع نفسنا
وشوية أفكار خاصه بالتأمل واليوجا على حبة زيت وزلط معين ونوم في إتجاهات محدده وحبه مزيكا وسيطره على الأفكار على حبة غموض وأسرار والواحد يشم فيها ريحه مش تمام
والخلاف الأساسي يا رجاله إن الله مش قوه .. الله شخص قوي
الله مش الجازبيه
لكن الله لديه جازبيه وإلهام لنا
الله روح لها قوه .. كيان مسيطر حي فعال ديناميكي
وهذا الإله المسيطر أعطى لنا قوه في داخلنا لنفعل كل شيئ
ونملك السلطان لنوال كل مانريد داخل مظلة نعمته
هما عرفوا يعملوا جو للحاجات اللي أصلا إحنا مسميينها .. إيمان
بس المشكله إننا في الكنيسه خلينا الموضوع بقى دمه تقيل وعامل زي واجب المواد الإجتماعيه وأحيانا بيبقى فيه حاله من الإستظراف ماتعرف على مصالح ما تعرف ومافيش مود mood مع وجود ناس بوظوا الدماغ والترانيم والصلاه وما بقيش فيه (حاله) وحولوا الأحاسيس إلى واجبات وطلعت أجيال ورا أجيال ما سمعتش أصلا عن حاجه غير (الموجود قدامك كُله يا بيه) أفسدوا علينا الطعم والريحه واللون وكرهونا في العيشه واللي عايشينها .. وما حدش بقى بيقول .. يع
عندي رؤيه إننا عاملين زي حقل مليان زهور عباد شمس .. ملايين .. والزهور دي نايمه وباصه للأرض وغالبا حد أقنعها إنها أعواد برسيم حجازي علف
وقرص الشمس منور في قلب السما بس الزهور رغم إنها حيه لكن نايمه
و فيه شويه غربان سود من مصلحتهم إن الزهور دي تنام عشان يسرقوهم لكن فجأه يظهر طفل صغير ماسك عصايه سحريه بيجري بين الزهور بيصحيها زهره زهره وكل زهره بتلمسها العصايه بتصحي وتتدور وتنتصب ناحية الشمس وورقها يتفتح ويطلع منها عطرها.
بس خلاص
طبعا ممكن نسأل
هو يقصد إيه بالغربان ؟
إيه موضوع العصايه .. هل دا سحر ؟؟ وهل السحر مذكور في الإنجيل وإذا كانت عين الحسود فيها عود أذكر نوع العود وط نق2 لقطره
لكن ممكن
ممكن نتخيل
وممكن نغير
وممكن يكون عندنا رؤيه
وممكن نكون الطفل
وممكن نختار
إننا نفوق
ونبص لفوق
ونكلم نفسنا على إننا زهور
مش برسيم حجازي
وكده
هاني روماني
