مسلسل "الداعية" ...مسلسل اتعرض في رمضان 2013...
بيحكي عن داعية مشهوووووورررر اوييي معجبينه بالملايين..وبيكسب فلوس كتييير اوي
هو اخ ل 3بنات وولد...واحدة من البنات متجوزة من شيخ برضه وكلهم عايشين في بيت واحد...
وبما ان الداعية هو الممول الرئيسي للبيت كله...وكمان هو "داعية" فطبعا تكونت لديه كل مقومات التحكم...بيتحكم في كل افراد البيت حتي المتجوزين...
المهم...روّح البيت في يوم لقي اخته الصغيرة بتعزف علي كمانجة....راح مسكها وكسرها...لأنها حرام....
لما شفت الحلقة دي....حسيت ان مفيش فرق بين بعض معلمين الكنيسة (الطائفة اللي انتمي لها علي الاقل) والدعاة والشيوخ المتطرفين.....
الفرق الوحيد ان معلمين الكنيسة اللي من النوع ده..ردود افعالهم اهدى شوية...يمكن تحت ضغط ضرورة الالتزام بالمبادئ المسيحية اللي بتنص علي الوداعة
يعني انا مثلا...اعتبر اتربيت مع داعية زي اللي في المسلسل
لو كنت بعزف كمانجة...مكانش هيكسرها.... مش عشان كسرها مش هيوقف موهبتي...لكن عشان التعاليم المسيحية هتمنعه من التصرف الاحمق...لكن في الاخر نفس المفهوم موجود...انها حرام .
وكان هيوعظني كل ما يقفشني انا والكمانجة مع بعض ، وكأنه قفشنا في ذات الفعل..
زي ما كان بيقوللي علي الاغاني وحتي الترانيم....مكانش بيقول "حرام" بالحروف...لكن بالمعني... انها مش هتخدم ابديتي ...
وطبعا ترانيم ال better life وموسيقاهم الصاخبة...
منظر الداعية (اللي في المسلسل)ده وهو بيؤم اخواته في الصلاة...وهو واقف قدام وهم وراه ولابسين عبايات طويلة يداروا بيها اجسامهم...فكرني بالداعية اللي في بيتنا واحنا صغيرين ...برضه كان بيقف قدامنا انا واخواتي البنات واحنا بنصلي...وبرضه كنا (البنات) بنلبس روب طويل عشان نداري اجسامنا...وطبعا بنلبس ايشاربات..نداري بيها شعرنا..وبرضه الداعية هو اللي كان بيؤم الصلاة...وعشان احنا مسيحيين..فتبقي بيقود الصلاة..لكن في الاخر الاتنين واحد
يس دي مكانتش مشكلة الداعية اللي في بيتنا لوحده...دي مشكلة الكنيسة كلها...
كمية تناقضات غريبة...
مثلا : لغاية قريب جدا مكانش من المفضل استخدام الالات الموسيقية في الاجتماعات....واستخدام الموسيقي كان علي مضض... وبعدين دخل الاورج..لكن الجيتار مرفوض...وكأن الاورج ارثوذكسي لكن الجيتار بروتستانتي
في نفس الوقت ده...بيقولوا للأهالي ان الولاد لازم ينموا مواهبهم...في العزف مثلا...
طب ازاي؟؟؟؟؟ ليه اعلم ابني حاجة يحرم استخدامها داخل سور الكنيسة؟؟؟
ولا هي حلال برة وجوة حرام؟؟؟ ما هي لو حرام جوة تبقي حرام برة......
ولا هو جوة مجتمع منافق ومناقض لنفسه؟؟؟؟
مينفعش البنات تقف وتكلم الولاد...... لكن عند الجواز مطلوب منها متتسرعش..وتفحص افكاره كويس...طب تفحص افكاره فين؟؟؟؟ اذا كانت ممنوعة من الكلام معاه جوة الكنيسة...يعني محرومة من صنف الرجالة كله...وفجأة مطلوب منها تقرر قرار مصيري صائب بأختيار زوج صالح مناسب ليها؟؟؟؟!!!!!!!!!!!!!
مينفعش المس اعضائي ...لكن مطلوب مني عند الجواز اكون عارفة وفاهمة العلاقة الحميمة واسعد جوزي؟؟؟!!!!!!! طب منين...اذا كنت محرومة طول عمري من مجرد التفكير في اعضائي؟؟!!!
لو مؤتمر روحي فيه بنات وولاد...ممنوع البنت تلبس شورت او قصير قدام الولاد..لئلا تثار غرائزه...مع ان نفس الولد ده ممكن يسافر معاها مصيف مع الكنيسة برضه وتلبس البنت مايوه وتنزل البحر معاه؟؟؟!!!! وكأن الولد وهو مسافر المصيف بيسيب غرايزه في البيت ويطلع من غيرها!!!! لكن في المؤتمرات بياخدها معاه؟؟؟!!!!!!!!!!
بتخيل تأثير المسلسل ده على المسلمين ...(المتشددين)...اعتقد انه مش بالضرورة يقنعهم بسرعة... لكن علي الاقل هيرمي جواهم فكرة...يمكن ييجي يوم وتصارع الافكار القديمة المتشددة ويمكن تغلب...ويمكن لأ
اما رد فعل المسلسل علي نفس الفئة من المسيحين....فيبقي رائع لو رمي جواهم الفكرة....لكن للاسف الفئة دي من المسيحيين بتشوف ان تطبيقات المسلمين بعيدة عنهم...زي apple و Microsoft تطبيقاتهم متركبش علي بعض
وهيقولوا "يارب المسلمين يفهموا"
مفيش فرق كبير بين التعليم والمعلمين في الكنائس اللي بالنوع ده وبين تعاليم ومعلمين الاخوان المسلمين...وحزب النور...
بتخيل لو كان المشهد السياسي وقت اعتصام رابعة في مصر معكوس...يعني لو قادة المسيحيين هم اللي قالوا ان المسيحيين ينزلوا يفترشوا الشوارع لغاية ما يرجع الرئيس المعزول...كان المسيحيين نزلوا...وخدولهم ميدان وباتوا فيه...صحيح مكانوش هيقتلوا ولا يضربوا ولا يقطعوا طريق...بس كانوا هيسمعوا الكلام ويباتوا ايام وليالي...
وكله عشان ربنا...ما هو برضه نوع من التبشير...
وكل مشكلة هيبقي ليها تفسير كتابي
هنبات في الشارع؟؟؟ "ابن الانسان ليس له اين يسند رأسه"
طب هناكل ايه؟؟؟ "تأملوا طيور السماء وزنابق الحقل"...
طب هنلبس ايه؟؟؟؟ اطلبوا اولا ملكوت السماء وبره وهذه كلها تزاد له
طب ريحتنا بقت وحشة من قلة الاستحمام؟؟؟ ده ربنا بيمتحن شدة ايماننا وصبرنا....زي أيوب
مع شوية تأملات في سفر الخروج وأيوب الليلة هتمشي وهيقتنعوا....ما هو اي فخفخينا تأملات بتقنع وبتمشي الحال وبتلغي العقل ..ويبقي الواحد مش مستطعم للي بيعمله...ولا فاهم هو بيعمل كده ليه بس اهو كله عشان ربنا...ما دام قادة الكنيسة هم اللي قالوا يبقي اكيد صح....
مش الاخوان بس اللي خرفان....
كله شغل خرفان.
